Marc Marquez, 8 herë kampion i botës në garat e motoçiklizmit, ka deklaruar se mund të jetë në pistë më 28 mars, në garën e parë sezonale të MotoGP, që zhvillohet në pistën e Losail, në Doha. Në këtë pistë pilotët kryen testet e fundit në prag të garës së parë sezonale.
Jo vetëm kaq, por pilotët që kanë patur dëshirë kanë kryer edhe dozën e parë të vaksinës anti-Covid të Pfizer e mes tyre ishte edhe Marquez. “E gjithë familja e MotoGP kishte mundësinë të kryente vaksinën dhe ky ishte një shans i mirë për të gjithë”, tha Marquez.
Duke folur për garën e parë, që zhvillohet më 28 mars, spanjolli i Honda tha: “Çdo gjë është e mundur. Gjithsesi, nuk garantoj asgjë, pasi rikuperimi vijon e mund të ketë të papritura”. Marquez nuk garon prej korrikut të vitit të kaluar, pasi kreu 3 operacione në shpatullën e djathtë.
