Manuel Nojer është duke hedhur hapat e parë drejt… biznesit. Portieri 35-vjeçar i Bajernit të Mynihut dhe kombëtares gjermane është bërë pjesë e kompanisë së shokut të tij dhe e ka ndihmuar atë që të shesë disa maska. Bëhet fjalë për Bjorn Borgman, i cili ka qenë “bodyguard”-i skuadrës së Shalkes, por edhe në kombëtaren gjermane.
Nojer dhe Borgman kanë raport të shkëlqyer me njëri-tjetrin dhe një miqësi që zgjat prej vitesh. Për këtë arsye, portieri e ka ndihmuar atë, por është bërë edhe pjesë e kompanisë së tij. Trajneri Hansi Flik dhe disa futbollistë të Bajernit përdorin vetëm maskat e sugjeruara nga Nojeri.
Bëhet fjalë për një maskë që ka siguri maksimale mbrojtjeje, edhe pse nuk është shumë e shtrenjtë. Një kuti me maska është afro 15 euro dhe një prej tyre kushton 75 cent. Nojer ka nisur të mendojë edhe për jetën përtej futbollit.
