Te Napoli nuk ka qetësi, teksa sikur të mos mjaftojnë rezultatet aspak të mira të skuadrës, tani edhe situata brenda në skuadër nuk është më e mira.
NMAPOLI GATUZO
Pas barazimit 3-3 ndaj Sasuolos, që la një shije të keqe te ambienti napolitan, skuadra iu kthye menjëherë stërvitjes, për t’u përgatitur për ndeshjen e ditës së diel, ndaj Bolonjës. Megjithatë trajneri Xhenaro Gatuzo nuk është shfaqur aspak i qetë në stërvitje, teksa ka larguar një lojtar nga stërvitja duke e dërguar në shtëpi.
Bëhet fjalë për Mario Ruin, i cili nuk ka lënë një shije të mirë te trajneri me stërvitjen dhe për këtë arsye është dërguar në shtëpi. Gatuzo e quante si mos impenjim në stërvitje atë që po bënte Rui dhe i kërkoi të largohej, raporton “La Gazzetta dello Sport”. Mbrojtësi nuk është aktivizuar në ndeshjet e fundit në kampionat, teksa në vendin e tij në të majtë të mbrojtjes, Gatuzo ka preferuar Ghulamin.