Real Madridi pret nesër Barcelonën në stadiumin “Alfredo di Stéfano”, një duel kyç për titullin në La Liga. Të bardhët janë tri pikë prapa udhëheqësit (Atlético Madrid), ndërsa të besuarit e Koeman vetëm një pikë larg. Kjo do të jetë “El Clasico” e parë në “Valdebebas”. Trajneri i Blaugrana-ve tha në konferencën për shtyp:
“Kemi arritur rezultate të mira kohët e fundit, ekipi është i sigurt. Real Madridi është përmirësuar gjithashtu gjatë sezonit. Ne po luftojmë për maksimumin, që do të thotë titulli në La Liga. Për këtë, veçanërisht ndeshja e nesërme është e rëndësishme. Rezultati nuk do të jetë vendimtar, sepse pas klasikes së nesërme ka ende mjaft ndeshje. Sigurisht, ekipi që fiton do të ketë një moral të rëndësishëm për të vazhduar përpara.
Piqué dhe Sergi Roberto? Janë dy lojtarë të rëndësishëm, jo vetëm për shkak të cilësisë së tyre. Ata janë mirë fizikisht, shumë të entuziasmuar, duan ta ndihmojnë ekipin. Është e rëndësishme që t’i kemi gati të gjithë lojtarët për ndeshjen e nesërme.
“Valdebebas”, një terren stërvitor? Është duke u diskredituar një klub i madh si Real Madridi. Për këtë stadium bëri ironi edhe Klopp, mbas ndeshjes së Champions-it (shpresojmë te kthimi, të paktën “Anfield” është një stadium i vërtetë). Drejtuesit kanë zgjedhur momentin pa tifozë për të ndërhyrë në “Santiago Bernabeu”, për mendimin tim kanë bërë mirë. Për lojtarët, gjëja më e vështirë është të luajë pa tifozë. Sidoqoftë, Reali është mësuar të luajë në këtë fushë, kundërshtarët e dinë se duhet të luajnë aty dhe kaq.
Klasikja është një ndeshje ndryshe nga të tjerat, sepse ka shumë interes nga të gjitha palët. Unë mendoj se Barça po bën mirë, ka një ecuri të rëndësishme, shumë pikë të grumbulluara. Ne synojmë për të fituar, por Real Madridi është Real Madridi. Ka marrë shumë kritika, por garon ende në Champions dhe për të fituar kampionatin. Unë nuk jam mbështetës i njerëzve që e kanë kritikuar aq shumë Real Madridin. Është një ekip me trajner mbresëlënës dhe lojtarë mjaft cilësorë. Të dyja ekipet e dinë rëndësinë e fitimit të kësaj ndeshjeje.
Skema e Real Madridit? Ka luajtur me sisteme të ndryshme, duhet të presim e shohim nesër. Detyra jonë është ta përgatisim ekipin dhe të dimë të reagojmë për çdo sistem. Ku do të luajë De Jong? E mira e Frenkie është se mund të luajë në shumë pozicione. Nëse luan qendror i mesfushës, ne mund të bëjmë më mirë me topin. Gjithashtu ka treguar se mund të bëjë edhe qendërmbrojtësin. Në të dyja pozicionet kontribuon shumë në ekip. Ai është një lojtar për trajnerin, sepse mund t’ia ndryshoni pozicionin.
Ramos dhe Varane? Për Realin janë mungesa të rëndësishme. Edhe ne kemi lëndime, Sergi Roberto dhe Piqué. Ato janë dy qendra të rëndësishme dhe shumë të mira. Njëri është gjithashtu kapiteni i Realit, i jep skuadrës shumë personalitet. Gjithsesi, në ndeshjen kundër Liverpool, lojtarët e tjerë dëshmuan se mund t’i përmbushin ato pozicione.
