E ardhmja e Serxho Ramosit duket gjithmonë e më shumë larg Realit të Madridit. Pas deklaratave të presidentit Florentino Perez në dy ditët e fundit, duket se kapiteni i skuadrës do të largohet në fundin e sezonit. “Serxho e di situatën. Ne nuk kemi shumë të ardhura. Duhet të mbarojmë sezonin, pastaj të vendosim”, ka thënë Perez.
Numri një i klubit ka lënë të kuptohet se nuk do ta rinovojë kontratën. Perez thotë se ai duhet të pranojë uljen e pagës, ashtu si gjithë të tjerët në këtë situatë shumë vë vështirë ekonomike. Vetë lojtari nuk ka ndërmend të tërhiqet, por do që të rinovojë me kushtet e tij. Madrilenët nga ana tjetër kanë arritur marrëveshjen me mbrojtësin David Alaba dhe ai duket se do të jetë pasardhësi i Ramosit.
Mbrojtësi madrilen ka nisur që të stërvitet me topin në fushën e lojës dhe mund të japë kontribut në këtë fund sezoni me skuadrën e Realit të Madridit. Trajneri Zinedin Zidan e vlerëson si një lojtar të rëndësishëm, pavarësisht gjithçkaje që do të ndodhë me kontratën e tij. Eksperienca e spanjollit është me vlerë dhe ai mund ta udhëheqë skuadrën drejt triumfit në Europë dhe në La Liga.