Gjykata Federale e Apelit, ka rritur dënimin ndaj presidentit të Lacios, Klaudio Lotito nga 7 muaj në 12 muaj pezullim nga të gjitha aktivitet futbollistike. Kjo për arsyen se klubi lacial nuk veproi si duhet me futbollistët 5 muaj më parë në lidhje me rregullat anticovid.
Në tetor të 2020, gjatë testeve të Covid-19 të kryera para ndeshjes me Klub Bryzhin në Ligën e Kampionëve, Çiro Imobile, Thomas Strakosha dhe Lukas Leiva rezultuan pozitiv me koronavirus, teksa tamponët e dy ditëve më përpara në sfidën kundër Torinos kishin dalë të gjithë negativë. U nis një hetim për mashtrim nga ana e skuadrës laciale në atë kohë dhe tani është dhënë dënimi.
Lotito gjithashtu është përjashtuar nga çdo rol brenda Federatës dhe do të ndalohet nga mbledhjet e këshillit të saj, duke humbur kështu gjitha postet që mbante në qeverinë e futbollit. Vlen të theksohet se edhe gjoba për klubi kryeqytetas është rritur nga 150 mijë në 200 mijë euro.
