Gazeta spanjolle “MARCA” ka renditur disa nga arsyet pse Super Liga është diçka që u leverdis skuadrave kryesore në Europë dhe pse ato u bënë pjesë e kësaj lëvizjeje për të sfiduar UEFA-n me një kompeticion të ri. Të drejtat e barabarta dhe milionat e shumtë janë ato që i shtynë këto skuadra të bëhen pjesë e Super Ligës.
1. Një nga argumentet kryesore është që turneu i ri nuk është kundër ligave kombëtare. Nuk bëhet fjalë për eliminimin e ekipeve të vogla sepse do të luhet kompeticioni në mesjavë. Nuk ndikohen kampionatet e 12 skuadrave pjesëmarrëse.
2. Ka shumë aktorë të fuqishëm, të cilët kanë frikë se UEFA mund të humbasë. Organizimi më i lartë i futbollit ka reaguar shumë ashpër sepse ka frikë se do ta humbasë Champions-in dhe rëndësinë e tij.
3. Klubet sigurisht që do të mendojnë për të ardhmen e tyre dhe për aspektin ekonomik. UEFA shpërndan shumë pak fonde, ndërsa me Super Ligën do të përfitojnë më shumë.
4. Tani do të jetë më e lehtë për ta kuptuar se ku do të shkojnë të ardhurat dhe mënyra se si shpërndahen. Për momentin nuk dihet asgjë se çfarë ndodh me paratë e grumbulluara nga të drejtat televizive nga Champions-i.
5. Super Liga nuk është një kompeticion i mbyllur si ligat e mëdha amerikane. Është një format miks, me 25% të skuadrave që do të kualifikohen për merita sportive. (15 ekipe do të jenë fikse dhe 5 të tjera do të ndryshojnë).
6. Interesant është fakti që të gjitha skuadrat që e kanë krijuar këtë kompeticion do të kenë të njëjtën peshë në vendimet që do të merren. Pra, pavarësisht se Reali i Madridit përfaqësohet me presidentin e Super Ligës, Florentino Perez, ka të njëjtën të drejtë ashtu si Atletiko, Interi, Milani apo skuadra të tjera në menaxhimin e turneut.
7. Ky kompeticion i ri po prezantohet si një turne shumë i gjatë dhe me kalendar të ngjeshur, por e vërteta është që ka vetëm 4 ndeshje më shumë sesa Champions-i. Pra nuk ka shumë sfida sfilitëse.
