Partizani ka siguruar i pari një biletë për në finalet play off në volejboll për meshkuj, pas fitores 3-0 ndaj Vllaznisë, në takimin e dytë gjysmëfinal luajtur mbrëmjen e sotme në Shkodër. Të kuqtë e trajnerit Tomorri i fituan të dyja përballjet gjysmëfinale, duke u kualifikuar me meritë për në finale. Një ndeshje me rivalitet, por me një epërsi të lehtë të Partizanit, që i fitoi të trija setet me shifrat e njëjta 25-20.
Finalisti i dytë do të dalë nga përballja e tretë mes Erzenit dhe Tiranës. Në gjysmëfinalen e dytë luajtur sot në “Fahrie Hoti”, skuadra bardheblu fitoi 3-1 ndaj shijakasave (25-20, 21-25, 25-21, 25-15). Erzeni rivalizoi tri sete, duke fituar të dytin dhe më pas u “dorëzua”. Tirana ishte më superiore në fushë, duke e merituar fitoren. Emri i finalistit të dytë do të mësohet pas 48 orësh, në ndeshjen e tretë mes dy ekipeve.
Play off – Gjysmëfinale Meshkuj
3 prill, Erzeni – Tirana, 3-0
3 prill, Partizani – Vllaznia, 3-0
5 prill, Tirana – Erzeni, 3-1 (1-1)
5 prill, Vllaznia – Partizani, 0-3 (0-2)
7 prill, Erzeni – Tirana