Më 28 maj 2011, Guardiola arriti majën. Ai ngriti Ligën e Kampionëve me Barcelonën në “Wembley”, pasi mposhti 3-1 Manchester United, duke e shtuar për herë të dytë në tri sezone këtë trofe në stolin e Barçës. Ai tashmë e kishte fituar atë më 2009. Pra, u ngjit në Olimp… Më pas, dyert i ishin mbyllur për një dekadë, nga ajo ditë e deri më sot. “Arritja në finale tani i jep kuptim gjithçkaje që kemi bërë në katër apo pesë vitet e fundit. Këta lojtarë kanë pasur vazhdimësi”, – tha Pep, pasi eliminoi PSG.
Mbasi e theu murin e çerekfinaleve me Manchester City, teksa kishte rënë ndaj Olympique Lyon (2020), Tottenham (2019), Liverpool (2018) dhe Monaco (2017, në raundin e dytë), dhe pengesën në gjysmëfinale; Chelsea (2012), Real Madrid (2014), Barcelona (2015) dhe Atlético Madrid (2016), që e kishin eleminuar atë radhazi me Bayernin, Guardiola kaloi në një finale, që do të jetë e 24-ta në karrierën e tij.
Në Porto, kundër Chelsea, ai do të jetojë betejën e tretë personale si trajner për Champions, 10 vite e një ditë pas triumfit të fundit. “Si lojtar, kur arritëm në finale me Barçën më 1992, dy i kishim humbur tashmë. Ndonjëherë kërkohet një proces, klubet e tjera fitojnë qysh në finalen e parë. Shpresoj se jemi ndër këta të fundit”, – tha një Pep, i cili mund të bëhet sonte trajneri i gjashtë që e fiton Champions-in me dy skuadra të ndryshme.
Ai do të bashkohej me klubin e Carlo Ancelotti-Milan (2003 dhe 2007) dhe Real Madrid (2014); Jupp Heynckes-Real Madrid (1998) dhe Bayern Munich (2013); José Mourinho-Porto (2004) dhe Inter (2010); Ottmar Hitzfeld-Dortmund (1997) dhe Bayern Munich (2001); si dhe Ernst Happel-Feyenoord (1970) dhe Hamburg (1983). Përveç kësaj, ai do të barazonte tre Champions-it e Zinedine Zidane, Ancelotti dhe Bob Paisley, duke u bërë një nga katër trajnerët më të suksesshëm në historinë e kompeticionit. Pep do të kthehej në majë, një vend i favorshëm për të.
“Njerëzit mendojnë se është e lehtë për të arritur finalen e Champions-it, por është e jashtëzakonshme”, – tha Guardiola. Si trajner, ai ka luajtur 23 finale, duke fituar 19 dhe duke humbur 4. Shkalla e suksesit: 82.6%. Me Manchester City ka fituar 7 finale: 4 në Kupën e Ligës, 1 në “FA Cup” dhe 2 në “Community Shield”. Pas “katërshes” angleze më 2019, ai kërkon “tripletën” më 2021: Premier League, ‘Carabao Cup’ dhe Champions. Guardiola aspiron titullin e 32-të të karrierës së tij, me të cilin do të mbyllte hendekun karshi Sir Alex Ferguson (49). Askush nuk ka më shumë trofe, përveç legjendës skoceze…
