Plot 8 lojtarë ishin në kuotën e tre kartonëve të verdhë para sfidës me Apoloninë dhe situata nuk dukej e favorshme për Partizanin. Megjithatë, edhe pse kundër fierakëve sfida ishte e luftuar, vetëm dy lojtarë u ndëshkuan, Mala dhe Bardhi.
Të dy këta futbollistë nuk do të udhëtojnë drejt Korçës, pasi kanë plotësuar numrin e 4 kartonëve. Ndërsa në kuotën e tre kartonëve dhe që rrezikojnë pezullimin në derbi nëse ndëshkohen kundër Skënderbeut, janë: Belica, Hakaj, Zhunior, Çinari, Asani dhe Melo, por ky i fundit e ka mbyllur me Partizanin para se ky sezon të përfundojë.
Kalendari për Partizanin i vë përballë ndeshjen e radhës në Korçë përballë Skënderbeut, ndërsa pas kësaj transferte delikate, vjen dhe derbi i fundit i kryeqytetit për këtë edicion futbollistik.