Trajneri kampion bote me Italinë, Marçelo Lipi, cilëson Nikolo Barelën si yllin e skuadrës së Roberto Mançinit në Europian.
Arkitekti i triumfit të të kaltërve në Gjermani 2006 flet për pritshmëritë e “Axurrëve” gjatë një interviste për “La Gazzetta dello Sport” dhe beson se fantazisti i Interit do të jetë ylli që do shkëlqejë për Italinë këtë verë. Por, për të nuk do të jetë aspak një surprizë, sepse 24-vjeçari tashmë është një lojtar i afirmuar.
“Barela nuk është plotësisht i ri, sepse ka dy sezone që luan me Interin dhe ka luajtur edhe në Champions, por ai do të jetë surpriza e Europianit. Ka ardhur koha e tij. Më pëlqen mënyra se si luan, se si lufton, se si vrapon. Ai është ylli ynë”, thotë Lipi për talentin e kampionëve të Italisë. Lorenco Insinje shënoi në pjesën e dytë në fitoren 4-0 ndaj Republikës Çeke në miqësoren e “Dall’Ara” dhe Lipi vlerëson edhe paraqitjen e sulmuesit të Napolit:
“Lorenco ishte i shkëlqyer kundër Çekisë. Ai luan gjithnjë me shumë kualitet në një kontekst që duket i bërë për të. Sapo Italia ka topin, ata vrapojnë në hapësirë dhe Insinje është gati, si nga krahët ashtu edhe në qendër”. Lipi shtoi se Italia është e vetëdijshme për forcën e saj, por nuk mendon se skuadra do të vuajë nga euforia:
“Këta djem dinë si të fitojnë. Ata janë të vetëdijshëm për forcën dhe superioritetin e tyre. Nuk është eufori, por vetëvlerësim. Këto dy miqësore kundër kundërshtarëve të fortë ishin bindëse dhe nga përvoja ime unë do të thosha se jemi gati”.
