Tenistja japoneze Naomi Osaka, numri 2 në botë për femra, ka vendosur të tërhiqet nga grand slam i Roland Garros. Ajo duhej të luante sot në raundin e dytë ndaj suedezes Rebecca Peterson, por për motive personale vendosi të ngrejë “flamurin e bardhë”.
Osaka e komunikoi vendimin përmes rrjeteve sociale: “Gjëja më e mirë për turneun është që unë të tërhiqem. E vërteta është se prej US Open 2018 e deri më tani vuaj nga depresioni. Kush më njeh e di se jam një person i qetë dhe të flas me gazetarët më krijon presion dhe ankth brenda vetes, që për momentin nuk jam në gjendje ta përballoj”, tha Osaka.
Osaka, në raundin e parë fitoi 2-0 ndaj sllovenes Kaja Juvan (6-0, 7-5), por nuk u paraqit në konferencën për shtyp. Për këtë gjë, ajo u penalizua me 15 mijë dollarë dhe paralajmërim për përjashtim nga turneu, pasi shkeli rregulloren.