Distria Krasniqi ka shkruar sot emrin e saj me shkronja të arta në sportin botëror, pasi ka fituar medaljen e artë në xhudo për Kosovën në Lojëra Olimpike Tokio 2020. Një triumf i jashtëzakonshëm, pasi sportistja kosovare ka mundur në finale favoriten vendase, Funa Tonaki, duke shkaktuar një nga surprizat e mëdha të aktivitetit.
Të gjithë pritnin një paraqitje dinjitoze të delegacionit të xhudos së Kosovës dhe pritshmëria është realizuar që në ditën e parë me Krasniqin, e cila nuk mbajti dot lotët teksa varte në qafë medaljen në podium.
“Unë jam shumë e lumtur, të dy medaljet e arta kanë ardhur nga një trajner, një skuadër. Ndaj unë jam krenare që jam pjesë e kësaj skuadre. Unë e fitova këtë medalje për këtë skuadër, trajnerin tim dhe sigurisht edhe për veten time. Të fitosh medaljen e artë këtu në Japoni, shtëpinë e xhudos, është shumë speciale”, ishin fjalët e xhudokas kosovare pas përfundimit të finales.