Sikurse njofton zyra e shtypit e FSHF-së, ditën e premte, në ambientet e sallës së konferencave të stadiumit “Air Albania”, do të hidhet shorti për kalendarët e dy kampionateve kryesore të futbollit shqiptar, Superiorja dhe Kategoria e Parë.
Shorti do të nisë në orën 10:00 me përcaktimin e kalendarit të Kategorisë Superiore dhe në 10:30 do të vijohet me caktimin e kalendarit të Kategorisë së Parë. Sipas vendimit të Komitetit Ekzekutiv të FSHF-së, Kategoria Superiore do të fillojë më 11 shtator 2021 dhe do të mbarojë më 26 maj 2022.
Edhe Kategoria e Parë nis po më datën 11 shtator 2021 për t’u mbyllur më 7 maj 2022. Në Kategorinë Superiore, sezonin e ri do të marrin pjesë këto skuadra: Teuta, Partizani, Vllaznia, Laçi, Tirana, Kukësi, Skënderbeu, Kastrioti, Dinamo dhe Egnatia.
Ndërsa në Kategorinë e Parë, ekipet pjesëmarrëse në edicionin 2021-2022 janë Apolonia, Besa, Besëlidhja, Burreli, Bylis, Erzeni, Korabi, Lushnja, Maliqi, Pogradeci, Shkumbini, Tomori, Turbina, Vora, Tërbuni dhe Butrinti.
