Heroi i kualifikimit ndaj Shiroki Brijeg, Fahrudin Gjurgjeviç, do të mungojë në ndeshjen e kthimit kundër AEL Limasolit, që do të zhvillohet më 29 korrik ora 21:00 në stadiumin “Loro Boriçi” të Shkodrës.
Kartoni i verdhë i marrë në takimin e parë në transfertë ndaj qipriotëve ishte i treti për sulmuesin nga Maqedonia e Veriut, duke plotësuar kështu numrin e tyre për të qenë i pezulluar me një ndeshje.
Mungesa e Gjurgjeviç i prish jo pak planet e trajnerit Tomas Brdariç, i cili e kishte aktivizuar sulmuesin si titullar në të dyja takimet e fundit.
Maqedonasi i ardhur gjatë muajit të kaluar në Shkodër pas aktivizimit me Rabotniçkin në sezonin e fundit, shënoi dy gola ndaj Shirokit në “Loro Boriçi”, duke i dhënë kualifikimin ekipit kuqeblu.
Pritet që në ndeshjen e kthimit ndaj AEL-it, në vend të Gjurgjeviçit të aktivizohet sulmuesi vlonjat Ardit Hoxhaj.
