Aktiviteti frenetik i Tiago Pinto në sistemimin e lojtarëve të tepërt po çon në disa rezultate. Kluivert është shumë afër Nicës, ndërsa Olsen pritet të jetë portieri i ri i Lille. Kjo situatë e përafron klubin verdhekuq me Arsenalin për Granit Xhakën, i cili mund të zyrtarizohet te Roma në ditët e ardhshme. E ardhmja e Justin Kluivert mund të vijojë në Ligue 1, nën urdhërat e trajnerit Galtier, i cili fitoi kampionatin e fundit me Lille.
Është vetë trajneri që e ka bindur anësorin hollandez për këtë pistë. Kluivert sapo është kthyer nga një sezon huazimi te Leipzig, ndërkohë që Nice dhe Roma janë afër një marrëveshje. Anësori holandez ka treguar gatishmërinë e tij, me operacionin që mund të përfundojë në ditët e ardhshme.
Pas disa javësh bllokimi, me këto dy largime të mundshme, Tiago Pinto do të përpiqet të mbyllë negociatat me Arsenalin për Granit Xhakën. Mesfushori shqiptar, me pushime këto ditë, është i etur të bashkohet me Mourinho. Roma i është afruar kërkesës fillestare të Arsenalit, e cila ishte 20 milionë euro. Oferta e fundit nga klubi verdhekuq do të ishte 15, plus 2.5 milionë euro bonuse të arritshme lehtësisht.
Tiago Pinto shpreson të jetë në gjendje të shtojë Xhakën në ekip për pjesën e dytë të përgatitjeve në Portugali, por kapiteni i Zvicrës mund t’i reduktojë pushimet dhe të arrijë në fillim të gushtit, si Florenzi e Cristante. Xhaka ka arritur një marrëveshje personale me Romën prej disa kohësh. Ai do të ketë një kontratë 4-vjeçare me vlerë 2.5 milionë euro në sezon, plus bonuse.
