Milani ka vazhduar sot përgatitjet për sezonin e ri me një miqësore kundër Modenas, të cilët skuadra e drejtuar nga Stefano Pioli e ka fituar me lehtësi. Skuadra e Serisë A ka dominuar duelin, duke dhuruar një lojë shumë të mirë dhe shënuar gola spektakolarë në duelin e mbyllur me shifrat 5-0.
Starti i Milanit në këtë ndeshje ishte mbresëlënës pasi që në minutën e 2-të kaloi në avantazh me anë të Brahim Diaz. Në minutën e 5-të, ishte Rafael Leao ai i cili dyfishoi shifrat pas një goditje nga këndi dhe në minutën e 9, shifrat shkuan në 3-0, pasi Tomori tundi rrjetën me një goditje me kokë.
Më pas e kishte radhën Kruniç të shënonte golin e 4-0, ndërsa Teo Hernandez me një goditje shumë të fortë nga distanca pas një goditje dënimi çoi shifrat në 5-0 pa u mbyllur pjesa e parë.
Në fraksionin e dytë të lojës, Pioli ndryshsoi plotësisht formacion, për të parë gjendjen e futbollistëve dhe Milani vazhdoi dominimin, por nuk gjeti më rrugën e rrjetës. Gjithsesi, një fitore e tillë ku titullarët treguan një formë shumë të mirë, me siguri do të kënaqë Piolin, pasi tregoi se ekipi po e nis si duhet edicionin e ri.
