Armando Broja do të rikthehet sot në qendrën stërvitore të Çelsit. Këtë herë, në dhomat e zhveshjes, sulmuesi i Kombëtares gjen kampionët e Europës që triumfuan në finalen e Championsit përballë Mançester Sitit.
Pas një sezoni debutues pozitiv te Viteshe në formën e huazimit, sulmuesi kuqezi është thirrur nga trajneri Tuhel, i cili ka kërkuar që të testojë Brojën dhe të tjera talente në pronësi të skuadrës londineze.
E ARDHMJA – Mirëpo, për Brojën nuk do të jetë aspak e thjeshtë që të fitojë besimin e trajnerit Tuhel. Kjo, për vetë hapësirat e pakta në skuadër. Sulmuesi kuqezi duhet të tregojë formë, forcë dhe cilësi të jashtëzakonshme, që të bindë trajnerin të rezervojë një vend në skuadrën e parë. Përndryshe, e ardhmja e Brojës në lidhje me Çelsin do të jetë e varur thelbësisht nga e ardhmja e dyshes Abraham-Zhiru.
Për këtë të fundit, lajmet e merkatos bëjnë me dije interesim nga Milani, ndaj mbetet për t’u parë. Largimi i qendërsulmuesit francez do të lironte një vend të rëndësishëm në ekip, që mund të shndërrohej në “asist” për 19- vjeçarin. Çelsi do të vlerësojë edhe kontratën e sulmuesit kuqezi, për të parë më tej një mundësi huazimi në rast se Tuhel nuk do të arrijë që të rezervojë një vend te blutë e Londrës.
