Medalja e Artë e Distria Krasniqit në Tokio mezi është kapërdirë në Serbi. Pjesa më e madhe e mediave e anashkaluan si lajm, megjithëse gjatë të gjithë kohës kanë raportuar lajmet për atletët serbë pjesëmarrës në disiplinën e xhudos në Olimpiadë.
Ato pak media që e pasqyruan e nxorrën me tituj si ai i televizionit “B92”, që në faqen e vet në internet shkruan “E ashtuquajtura Kosovë fiton Medalje të Artë në Tokio”.
Media serbe i referohej fitores së Distria Krasniqit dhe pasi përshkruan rrugëtimin e sportistes kosovare drejt medaljes së artë thotë se atletja nga “e vetëshpallura Republikë” bëhet e dyta që fiton këtë medalje pas Majlinda Kelmendit që bëri të njëjtën gjë në lojërat olimpike të 2016-s në Rio.
Distria Krasniqi mposhti në finale japonezen Funa Tonaki, ndërsa më herët fitoi ndaj mongolezez Urantsetseg Mkbat, Hao-Chen Lin nga Tajvani dhe brazilianen Gabriela Chibana.
