Shamrok Rovers, rivali i Teutës në turin e tretë të Ligës së Konferencës, është kampioni në fuqi i Irlandës dhe vjen në këtë raund pas eliminimit nga Liga e Kampioneve kundër Sllovan Bratislavës.
Në turin e parë në Champions, irlandezët humbën 2-0 në Sllovaki, ndërsa në takimin e kthimit fituan 2-1, por ky rezultat nuk mjaftoi për të shkuar më tej. Shamrok drejtohet nga 36-vjeçari Stefen Bradlei, që prej vitit 2016 dhe aktualisht është në kulmin e sezonit në Irlandë. Në ndryshim nga vendet e tjera europiane, kampionati në shtetin britanik ka nisur në muajin mars.
Aktualisht në elitën e Irlandës janë luajtur 22 javë dhe Shamroku kryeson renditjen me 44 pikë, tri më shumë se ndjekësi më i afërt, St. Patrik Atletiks të cilin e mundi mbrëmjen e djeshme me rezultatin e pastë 3-1.
Rivali i Teutës po kalon një formë të shkëlqyer, por kjo kurrsesi nuk mund të trembë durrsakët. Kundërshtari i radhës është shumë më i fortë se andorrianët e Inter Esklades, por durrsakët kanë shanse të mëdha për të bërë historinë në Ligën e Konferencës. Sfida e parë do të luhet të enjten e ardhshme, në orën 21:00, në stadiumin “Tallaght”, me një kapacitet prej 8 mijë vendesh.
