Vjen buletini i parë mjekësor i PSG për qendërmbrojtësin veteran spanjoll. Bashkë me të vjen edhe ndalesa e parë e Sergio Ramos me klubin e ri, ku u transferua këtë verë. Mbrojtësi pësoi një dëmtim në këmbën e majtë dhe do të duhet të qëndrojë i palëvizshëm për një javë, për t’u rikuperuar nga problemi i muskujve.
Me një fjalë, sikurse edhe pritej pa këtë lëndim të ri, nuk do të jetë në dispozicion për ndeshjen e Superkupës kundër Lille. Njëkohësisht, shtohet ankthi te parizienët, sepse me të tilla dëmtime 36-vjeçari kaloi pothuajse gjysmën e fundit të sezonit të shkuar, duke mos luajtur thuajse fare.
Lëndimet muskulore e mbajtën ish-kapitenin e Real Madridit edhe jashtë kombëtares spanjolle për “Euro 2020”. Një blerje e bujshme e Al Khelaifi, por me muskuj kristali në këtë moshë, sikurse po e konfirmojnë ndalesat e shumta.
