Trajneri i Juventus-it, Massimiliano Allegri, ka folur në konferencë për shtyp në prag të ndeshjes së kampionatit që bardhezinjtë do të luajnë nesër kundër Empoli-t.
Allegri ka zbuluar bisedën që ka patur me Cristiano Ronaldo-n, i cili pritet të transferohet te Manchester City në orët ose ditët e ardhshme.
“Cristiano më ka thënë dje se nuk ka ndërmend të vazhdojë me Juventus-in. Për këtë arsye nuk do të jetë i grumbulluar për nesër, dje nuk është stërvitur dhe tani mund të flasim për Empoli-n”, ka thënë trajneri i bardhezinjve.
“Ndeshja me Empoli-n është gjëja më e rëndësishme, në Udine nuk kemi fituar një sfidë që ishte futur në rrugën e duhur. Nesër duhet të fitojmë kundër një skuadre që luan një futboll të bukur. Duhet ndeshja e duhur për të marrë tri pikët”.
