Xhiorxhio Kielini vazhdon të paraqitet në nivelet më të larta me Juventusin dhe përfaqësuesen italiane. Ndonëse sapo ka mbushur 37 vjet, kapiteni i Italisë bëhet gati që të luajë një tjetër turne madhor me të kaltrit, pavarësisht faktit se tashmë cilësohet një “veteran”.
Dhe në konferencën e sotme për shtyp, para ndeshjes ndaj Spanjës, Kielini është ngacmuar nga gazetarët nëse e ndjen veten si “Ibra i mbrojtësve”. Futbollisti, i cili shpesh ka dhuruar shkëndija në fushë me sulmuesin suedez, nuk i ka rezistuar tundimit për t’iu përgjigjur me një batutë rreth lojtarit të Milanit.
“Ibra është Ibra, është një qenësi aq e lartë sa më mirë ta lëmë rehat. Unë këtë vjetërsi futbollistike po e gëzoj, argëtohem dhe të shohim se ku do të mbërrij me kaq shumë të rinj që më japin energji”, ishte përgjigja e mbrojtësit italian.