Ronald Koeman ka dalë në konferencën për shtyp në prag të El Clasicos ndaj Realit të Madridit, ku është ndalur sërish te rëndësia e kësaj sfide për të ardhmen e tij në krye të pankinës së katalanëve.
“Unë e kam thënë gjithmonë dhe po e përsëris edhe njëherë. Kam mbështetjen e drejtuesve të klubit në punën që bëj, por e di që rezultatet janë shumë të rëndësishme për një trajner. Unë e bëj këtë profesion prej vitesh dhe e di që presioni është diçka normale, megjithatë e kemi përgatitur ndeshjen për të fituar”, u shpreh holandezi.
Tekniku katalan ishte vetëm një hap larg shkarkimit, por drejtuesit e Barcelonës vendosën t’i japin një tjetër mundësi dhe deri tani skuadra ka reaguar mirë në fushë, megjithatë El Clasico do të vendosë shumë edhe për të ardhmen e tij.
Kjo pasi një humbje e mundshme ndaj madrilenëve, do të komplikonte pretendimet e katalanëve për të fituar titullin kampion në Spanjë dhe natyrisht edhe punën e trajnerit Koeman.
