Niko Ali Uolsh, nipi i legjendës së boksit Muhamed Ali, ka fituar ndeshjen e dytë si profesionist me nokaut, kundër Xhejms Uestli.
21 vjeçari e mbylli sfidën që në raundin e tretë pas një goditjeje të fuqishme, që e rrëzoi kundërshtarin duke bërë që arbitri të ndalonte ndeshjen.
Në përfundim të ndeshjes Niko u shpreh shumë i lumtur për fitoren.
“Jam shumë i lumtur. Falenderoj Zotin sepse më dha fitoren dhe jam i kënaqur për mënyrën sesi shkoi ndeshja. Dua të falënderoj të gjithë ekipin tim dhe ata që më kanë mbështetur në këtë rrugëtim”,- u shpreh amerikani.
Nuk mund të mungonte dhe një pyetje lidhur me paraardhësin e tij Muhamed Ali, prej të cilit duket se ka trashëguar një goditje ‘shkatërrimtare’.
“Jam i nderuar që po vazhdoj traditën e gjyshit tim. Të gjithë ata që e kanë adhuruar dhe që po më shohin tani, e dinë që jam krenar për këtë moment”.
Muhamed Ali konsiderohet nga shumë fansa si bokseri më i madh i të gjithë kohërave. Impakti që kishte si brenda por dhe jashtë ringut, vazhdon të përflitet edhe në ditët e sotme. Ai u nda nga jeta në moshën 74 vjeçare, në vitin 2016-të, pas një sëmundjeje të rëndë.