Dushan Vlahoviç cilësohet si ylli i së ardhmes në Serinë A aq sa sezonin e kaluar u shpall “Lojtari i ri më i mirë i sezonit”.
21-vjeçari serb ishte afër transferimit tek Atletiko Madrid këtë verë, por presidenti i violëve refuzoi ofertën prej 70 milionë eurosh duke shpresuar t’i vinte një ofertë më e majme. Por, presidenti Komiso ka dalë ditën e sotme me një deklaratë për tifozët ku shpjegon se Vlahoviç ka refuzuar të rinovojë duke zhgënjyer së tepërmi tifozët që e cilësojë si yllin e klubit.
“Siç e dini, Fiorentina i bëri një ofertë shumë të rëndësishme lojtarit, një propozim kontrate që do ta kishte bërë atë lojtarin më të paguar në historinë e klubit, por pavarësisht përpjekjeve tona, propozimi i rinovimit nuk u pranua.
Për mua dhe Fiorentinën, gjithçka që mbetet është të marrim parasysh vullnetin e lojtarit. Së shpejti do të gjejmë zgjidhje të realizueshme dhe adekuate”, shkruhet në deklaratën e presidentit Komiso.
Tani mbetet mister e ardhmja e talentit serb ndaj të cilit Juvja ka kohë që ka shfaqur interes dhe do të formonte një dyshe me Kiezën në sulmin e bardhezinjve.