“Rregull dhe disiplinë” është baza e projektit të trajnerit të ri të Barcelona-s, Xavi Hernandez. Ish-mesfushori ka bërë të qartë gjatë prezantimit se do t’i imponojë skuadrës disa norma që ka mësuar dhe respektuar si lojtar:
“Gjërat kanë shkuar gjithmonë mirë kur në grup ka patur rregull dhe disiplinë”.
E përditshmja AS ka zbuluar 10 rregullat që Xavi do t’i kërkojë skuadrës të respektojnë me synimin për t’u rimëkëmbur.
1 – Xavi do të vendosë një orar të ri për seancat stërvitore: afati i fundit për mbërritjen e lojtarëve do të jetë në 9:30, një orë e gjysmë përpara fillimit të seancës. Në këtë mënyrë do të ketë hapësira për bisedat mes futbollistëve dhe ish-mesfushorit.
2 – Do të ndryshojnë oraret edhe për stafin me asistenët e tij dhe pjesën tjetër që do të duhet të paraqiten dy orë para seancës stërvitore, në mënyrë për të qenë gati për mbërritjen e lojtarëve.
3 – Gjatë ditës, skuadra do të duhet ta konsumojë drekën vetëm në sallën e ngrënies të klubit, me një dietë të fiksuar sipas parametrave të ekspertëve të ushqimit të klubit.
4 – Xavi do të vendosë një kod të rreptë sjelljeje, që parashikon gjoba edhe për faulle që mund të bëhen në stërvitje. Kjo ide është marrë direkt nga eksperienca me Guardiola-n.
5 – Janë parashikuar gjoba edhe për ata që do të vonohen dhe do të rriten në rast se gabimi do të përsëritet: 100 euro për gabimin e parë, 200 për të dytin e kështu me radhë.
6 – Më pas do të ketë një kontroll edhe për aktivitetin e jashtë të skuadrës para ndeshjeve: futbollistët do të duhet të kthehen në shtëpi brenda mesnatës.
7 – Xavi do të zgjedhë lojtarët që do të zbresin në fushë në bazë të një sistemi meritokracie. Nuk do të ketë titullarë fiks: vendi në skuadër do të duhet të fitohet falë punës së bërë në ndeshje dhe në stërvitje.
8 – Xavi dhe stafi i tij do të kontrollojnë të gjitha aktivitetet e futbollistëve që mund të ndikojnë te paraqitja e tyre në fushën e lojës. Për shembull, do të jenë të ndalura udhëtimet e shpeshta private.
9 – Do të jenë të ndaluara edhe të gjitha aktivitetet e lojtarëve që konsiderohen të rrezikshme: Xavi synon të shmangë në çdo mënyrë dëmtime të reja dhe lojtarët do të gjobiten në rast të shkeljeve.
10 – Në fund, të gjithë lojtarët do të duhet të ruajnë imazhin e mirë të klubit: do të duhet të respektojnë rregullat, të përshëndesin dhe të ndërveprojnë me tifozët, të mbështesin skuadrën dhe të shmangin sjelljet e gabuara.
