Casemiro ka folur në një intervistë të dhënë ESPN në lidhje me Real Madrid, Topin e Artë dhe trajnerin Carlo Ancelotti.
MESFUSHA – “Është një privilegj të luash për klubin më të madh në botë dhe mendoj se do ta kuptoj atë që kam bërë vetëm kur e gjitha kjo të ketë mbaruar. Ka qenë një privilegj të luaj për shumë vite me Luka Modric dhe Toni Kroos, do ‘ua rrëfej nipërve të mi: kam luajtur me dy lojtarë të jashtëzakonshëm, dy ikona të futbollit”.
TOPI I ARTË – Braziliani ka dhënë mendimin e tij edhe për Topin e Artë: “Është një privilegj të luaj në krah të Karim Benzema dhe shpresoj që ta fitojë Topin e Artë. Vinicius? Po kalon momentin e tij më të mirë, ka shumë potencial”.
TRAJNERI – Mbi diferencat mes Zidane dhe Ancelotti:
“Çdo trajner ka metodën e tij të punës dhe fatmirësisht po përshtatemi shumë mirë me metodën e Carlo Ancelotti-t, siç kemi bërë për një kohë të gjatë me Zidane. Por dua të theksoj një gjë që e bën speciale punën e Ancelotti-t: është një burrë 62 vjeç, që ka fituar gjithçka, por vendosmëria dhe dëshira e tij për të fituar është e pabesueshme”.
KRAHASIMI – Braziliani ka folur edhe në lidhje me krahasimin mes tij dhe N ‘Golo Kante:
“Dua të kujtoj se Kante, pavarësisht se është një lojtar i jashtëzakonshëm, mbulon një pozicion të ndryshëm, me më shumë liri për të sulmuar. Mesfushori i parë mbrojtës i Chelsea-t është Jorginho. Personalisht jam i kënaqur që konsiderohem mes mesfushorëve më të mirë dhe vazhdoj të punoj për t’u përmirësuar”.
