Përfaqësuesja shqiptare e futbollit ka zhvilluar në terrenet stërvitore të Universitetit Brunel në Londër, stërvitjen e fundit të saj para ndeshjes me Anglinë. Kuqezinjtë i kanë dhënë aty dorën e fundit përgatitjeve për këtë ndeshje ku luhen shanset e fundit që ka për të qenë pjesë e play-off për Botërorin 2022.
Një seancë stërvitore ku radhëve të përfaqësueses i është bashkuar edhe Armando Broja. Lojtari kishte qëndruar në Angli për t’u rikuperuar nga një dëmtim në kavilje që e ka shqetësuar në javët e fundit dhe për të qenë vetëm sot përsëri pjesë e ekipit.
Megjithatë, situata e tij nuk është optimale, pasi lojtari është vënë menjëherë nën kujdesin e stafit mjekësor, për t’i fashuar kaviljen e dëmtuar, para se të bashkohej në ushtrime me pjesën tjetër të skuadrës. Sipas asaj që tha trajneri Reja, Broja nuk parashikohet të jetë titullar, por po monitorohet gjendja e tij për ta aktivizuar disa minuta në pjesën e dytë.