Kastrioti vijon të zhgënjejë, teksa në ndeshjen e fundit u mposht 3-0 nga Tirana. Kjo humbje i mban krutanët në vendin e fundit në klasifikim me vetëm tri pikë të grumbulluara në 12 javë kampionat, shifra që nuk përputhen aspak me sezonet e shkuara.
Pavarësisht se ende jemi në javën e 12-të dhe mbeten dhe 24 javë për t’u zhvilluar, frika mbizotëron te tifozëria vendase, e cila këtë sezon është zhgënjyer nga këto rezultate. Mirëpo, krejt ndryshe është situata te stafi teknik i cili ka besim se rezultatet do të vijnë. Në dy javët e mbetura krutanët do të ndeshen me dy rivalët e mbijetesës, me Egnatian dhe Skënderbeun. Dhe mbase në këto dy ndeshje skuadra e Ndreut do të synojë të rikuperojë diçka.
Pas ndeshjes me Tiranën, lojtari që kreu zëvendësim të detyruar ishte Arbër Basha, i cili pati shqetësime, ndërsa mbetet të shihet nëse do të jetë i gatshëm për sfidën e fundjavës. Gjithashtu, për ndeshjen me Egnatian krutanëve u rikthehet edhe mbrojtësi i majtë Armando Rami, i cili për ndeshjen me bardheblutë ishte i pezulluar për shkak kartonësh. Kastrioti në këto javët e mbetura deri në merkaton e janarit duhet të vuajë edhe mungesat e shumta, të cilat kanë lënë boshllëqe në ekip nga ku stafi teknik po “arnon” javë pas jave lojtarë në rolet jonatyrale.
