Aleksandar Kolarov është gati që të lërë përfundimisht Interin.
Sipas asaj që raporton “TuttoMercatoWeb”, mbrojtësi serb nuk shihet në planet e trajnerit Simone Inzagi dhe ka vendosur për të ardhmen e tij, teksa ditën e nesërme do të ketë një takim personalisht me agjentin e tij dhe drejtuesve zikaltër për të ndërprerë konsensualisht kontratën e tij, teksa me shumë mundësi serbi do të “varë këpucët në gozhdë”.
36-vjeçari do t’i japë lamtumirën skuadrës nga Milano pas 15 prezencave në total në të gjitha kompeticionet në dy sezonet me Interin.
Ish-lojtari i Romës, Mançester Sitit dhe Lacios erdhi te Interi falë insistimit të Antonio Kontes për të luajtur në qendër të mbrojtjes, por që pas penalltisë së shkaktuar në derbin e parë të sezonit të kaluar ndaj Milanit në dëm të Zlatan Ibrahimoviç, minutat e tij me fanellën zikaltër ishin të pakta.