Ndeshja kundër Elçes në Kupën e Mbretit të enjten në mbrëmje ka qenë e veçantë për Karlo Ançelotin. Ai ka festuar ndeshjen e tij numër 150 në krye të solit të madrilenëve, duke përmbledhur të dyja etapat e tij në Spanjë.
Ai e ka festuar me fitore këtë takim jubilar, duke siguruar dhe kualifikimin për në çerekfinalet e Kupës së Spanjës. Në 150 takime në drejtimin e Realit, tekniku italian numëron 113 fitore, 18 barazime dhe 19 humbje.
Ai është bërë trajneri i shtatë në historinë e Realit të Madridit që arrin këtë shifër në bankinë. Vetë klubi i ka bërë dhuratë një fanellë me numrin 150 që përkon me numrin e ndeshjeve të tij në krye të “Los Blancos”.
Ai ka falënderuar Realin për këtë dhuratë duke premtuar suksese të mëtejshme. Por trajneri i Realit ka shpërthyer kundër Federatës Spanjolle dhe Ligës Profesioniste për kalendarin e ngjeshur. Federata Spanjolle ka vendosur që takimet çerekfinale në Kupën e Spanjës të luhen më 2 dhe 3 shkurt. Reali do të përballet me Bilbaon ku rrezikon të gjendet me mungesa të shumta.
Pesë lojtarët nga Amerika e Jugut: Militao, Kasemiro, Vinicius, Rodrigo dhe Valverde janë grumbulluar me kombëtaret e tyre (Brazil e Uruguai) dhe do të luajnë më 2 shkurt. Ndërsa Reali luan me datë 3 shkurt në Bilbao në Kupë.
Klubi ka kërkuar shtyrjen, por Federata Spanjolle ka injoruar kërkesën e Realit. Për këtë ka reaguar dhe Ançeloti, i cili ka qenë mjaft i ashpër. “Çfarë të them për kalendarin? Është një çmenduri. Ata që vendosin duhet zgjohen”, ka thënë italiani.
