Arsenali arriti një fitore të rëndësishme ditën e shtunë përballë Brentfordit, 2-1, por një ngjarje e pakëndshme ka ndodhur për mesfushorin shqiptar Granit Xhaka.
Kapiteni i Arsenalit, Aleksandër Lakazet, u zëvendësua në minutën e 84-t për t’i lënë vendin Edi Nketiahut. Ky i fundit vrapoi me shiritin e kapitenit për t’ia dhënë Xhakës, por mesfushori refuzoi që ta pranonte.
Një skenë që nuk u la shije të mirë tifozëve të “Topçinjve”, shumë prej të cilëve shpërthyen kundër ish-kapitenit të tyre në rrjetet sociale. Por ai që qetësoi gjakrat ishte tekniku i Arsenalit, Mikel Arteta.
Spanjolli u shpreh se zëvendëskapiteni i ekipit është Tiernej dhe jo Xhaka, për këtë arsye mesfushori nuk e pranoi.
“Tirnej ishte i dyti në radhë për të marrë shiritin dhe kjo ishte arsyeja. Ndoshta Edi nuk i kuptoi udhëzimet dhe Graniti i tha se duhet t’ia jepte Tirnejt. Kjo është e gjitha”, tha Arteta.
Nga kjo përgjigje kuptohet se sezonin e ardhshëm Tirnej do të jetë një nga kandidatët për të marrë në dorëzim shiritin e kapitenit, i cili ka ndryshuar shumë shpesh krah këto kohë në “Emirates”.
Prej zhgradimit të Obamejangut në janar, Arteta ia ka dorëzuar atë provizorisht Lakazetit, i cili është në skadencë kontrate.
Granit Xhaka turns his nose up at the Arsenal armband ©️🤔 pic.twitter.com/NiGt73wx9C
— DAZN Canada (@DAZN_CA) February 19, 2022
