Milan u ndal sërish, këtë herë në një barazim 1-1 në “San Siro” përballë Udinese. Miqtë barazuan shifrat në minutën e 66-të me Udogie, por ky ishte një moment i pastër për moviole, një rast i dyshimtë për prekje të topit me dorë që e pranoi edhe vetë protagonisti: “A mendova se e preka topin me dorë? Po, pasi pashë edhe anësorin që dukej i pavendosur, nuk isha i bindur, por me eci mirë këtë herë”, u shpreh Udogie pas ndeshjes.
Ky episod nuk u prit aspak mirë nga trajneri Stefano Pioli i cili nuk përdori lojëra fjalësh por ishte i qartë teksa theksoi se ky episod vendosi ndeshjen: “Nuk ishte një episod i dyshimtë, lojtari i Udineses bëri gol me dorë. Mbase arbitri mund të mos e shihte se kishte shumë lojtarë përpara por të mos e shoh as VAR më duket e vështirë. Është një gabim i madh që vendosi rezultatin e ndeshjes”, u shpreh Pioli.
