Pep Guardiola “u ledhatua” nga Antonio Conte në konferencën për shtyp, në prag të ndeshjes Manchester City-Tottenham. Trajneri italian tha se kolegu i tij është “trajneri më i mirë në botë”. Sidoqoftë, ish-trajneri i Barcelonës u përgjigj me diplomaci:
“Faleminderit shumë, por nuk jam më i miri. Kam mësuar shumë duke parë ekipet dhe lëvizjet e tij. Në klubet ku shkon mbështeten 100% tek ai dhe idetë e tij. Nëse edhe Tottenhami e bën këtë, do të jetë i suksesshëm. Në sezonin tim të parë në Angli ishte e vështirë kundër tij.
Antonio bëri gjëra të mëdha në stolin e Juventusit, Interit dhe Chelsea. Ai ka ndryshuar shumë gjëra, edhe kombëtarja italiane luajti shkëlqyeshëm me të. Kam respekt të jashtëzakonshëm për Conte. Ndikimi i tij në Premier League ishte gjithashtu i dukshëm.
Shumë skuadra kanë filluar të luajnë me modulin e tij në mbrojtje. Ai ka ndryshuar shumë ekipe, fitoi titullin në Premier League në mënyrë fantastike. Ka lënë gjurmë në këtë kampionat”.
