Trajneri i Realit të Madridit, Karlo Ançeloti, është shfaqur mjaft i kënaqur pas suksesit kundër Vajekanos. Falë kësaj fitoreje, Reali vazhdon të qëndrojë i qetë në krye të La Ligës, duke mbajtur të distancuar Seviljen e vendit të dytë.
“Ndoshta të tjerët e shohin ndryshe paraqitjen e skuadrës, por unë nuk shoh asgjë negative. Unë mendoj se jemi në rrugën e duhur për arritjen e objektivit. Pastaj po flasim për kampionatin spanjoll, nuk ka ndeshje të lehta. Është e vërtetë që Kurtua ka bërë disa ndërhyrje të rëndësishme, por nuk më duket e drejtë të themi se fitorja jonë i detyrohet vetëm atij. Kemi fituar ndaj Vajekanos sepse kemi qenë skuadra më e mirë në fushë”, ka thënë Ançeloti.
Trajneri i Realit ka vlerësuar dhe rivalin e Madridit. “Nuk ishte një ndeshje e lehtë, sepse terreni nuk ishte aspak i mirë. Mund të them se ishte i keq që nuk të lejonte të luaje. Vajekano ishte një finale për ne dhe për fat e fituam. Tani kemi Sociedadin, pastaj PSG-ja”.