Të gjithë lojtarët e Realit e kanë pasur mendjen te festimet për titullin. Mes tyre edhe portieri Tibo Kurtua. Por belgu i portës së Madridit nuk ka harruar që mes festimeve të gjejë vend për të thumbuar edhe rivalen e Realit, Barcelonën.
“‘Klasikja’ kundër Barçës ishte çelësi që na çoi te suksesi, edhe pse u mundëm keq. Disa madje e festuan fitoren në ‘Klasike’ si të kishin marrë titullin, që ishin kthyer të mëdhenj. Por ne vijuam rrugën tonë, nuk e humbëm qetësinë e përqendrimin. Fituam me radhë takimet tona deri në suksesin kundër Espanjolit që na dha dhe titullin”, ka thënë numri një i portës së Realit.
Belgu më pas ka analizuar sezonin e “Los Blancos”, duke kërkuar nga shokët e tij dhe një sforco të radhës në Champions. “Kemi bërë një sezon të shkëlqyer dhe shpresojmë ta kurorëzojmë me Ligën e Kampioneve. Duam të shkojmë patjetër në finale. Nuk do të jetë aspak e lehtë, por kemi treguar se të gjithë së bashku mund të bëjmë gjëra të mëdha”, ka thënë Kurtua.
