Sot në mbrëmje Interi do të presë në “San Siro” Sampdorian për ndeshjen e vlefshme për javën e 12-të të Serisë A.
Zikaltrit do të kërkojnë t’u japin vazhdimësi rezultateve pozitive dhe zgjedhjet e Inzagit do të kushtëzohen jo vetëm nga tri pikët në lojë, por edhe nga dy sfidat e radhës, ato ndaj Bajern Mynihut e Juventusit.
Me Brozoviçin që nuk ia ka dalë për sot, i sapo kthyeri Lukaku do ta nisë nga pankina dhe në sulm priten përsëri Xheko e Lautaro.
Balotazhi dhe pikëpyetja më e madhe e trajnerit duket në mesfushë, aty ku Asllani dhe Mikhitarian luftojnë për një fanellë titullari.
Më i favorizuari 20-vjeçari për ta nisur nga minuta e parë, ndërsa armenit do t’i takojë sfida ndaj bavarezëve.
Rikthimi i De Vrajit në qendër të mbrojtjes do të jetë i vetmi ndryshim i sigurt nga ndeshja me Plzenin, pavarësisht se dilemat e trajnerit prekin edhe krahët, aty ku Dumfris e Dimarko nisen favoritë ndaj Darmianit e Gosensit.
