Të gjithë në kërkim të një “bomberi” të ri. Jo vetëm Real Madrid dhe Bayern Munich, gjetja e një qendërsulmuesi është kthyer në domosdoshmëri edhe për Man.United. “Djajtë e kuq” e kanë bërë të qartë synimin e tyre, objektivi kryesor është Harry Kane. Trajneri Ten Hag i ka kërkuar drejtuesve të klubit të bëjnë një sforco ekonomike për të siguruar kartonin e sulmuesit të Tottenham.
Sipas The Sun, tani edhe Harry Kane e ka një çmim. Gjithnjë sipas të përditshmes angleze, Harry Kane mund të largohet për 100 milionë euro, kjo e kushtëzuar edhe nga fakti që në 2024 “bomberit” anglez i përfundon kontrata. Nëse për një arsye apo për një tjetër, Kane nuk transferohet në “Old Trafford”, Man.United ka një plan B.
Sipas mediave angleze, Lautaro Martinez është përfshirë në listën e dëshirave për sezonin e ri. Në fakt, Martinez nuk është një emër i ri në ishull, edhe më herët United është interesuar për shërbimet e sulmuesi të Inter. Pavarësisht se “demi” ka shprehur dëshirën e tij për të qëndruar në Milano, merkato ka vërtetuar se gjithçka mund të ndodhë. Për kartonin e Martinez, Man.United është gati të investojë deri në 80 milionë euro. Emri i Martinez është sponsorizuar së fundmi dhe nga legjenda e tij klubit, Paul Scholes.
