Pritej të ishte ndeshje e luftuar dhe ashtu rezultoi. Gjithsesi, në fund të sfidës mes Bregut të Fildishtë dhe Nigerisë pati vetëm një fitues. Nigerianët triumfuan 0-1 në Stade Olympique Alassane Ouattara (Abidjan), në ndeshjen e vlefshme për grupet e Kupës së Kombeve të Afrikës.
Goli i vetëm i takimit mban firmën e William Troost-Ekong, me mbrojtësin që realizoi nga pika e bardhë e penalltisë, vetëm 10 minuta nga fillimi i pjesës së dytë. Të besuarit e Jean-Louis Gasset rritën presionin por nuk mundën dot të gjejnë golin e barazimit.
As shtesa e konsiderueshme prej 9 minutash nuk solli gol, pavarësisht rasteve. Pas xhiros së dytë të grupeve, Nigeria renditet në vendin e dytë me 4 pikë, një pikë më shumë se Bregu i Fildishtë i vendit të 3-të.
