Futbolli botëror ka marrë sot lajmin e trishtë të ndarjes nga jeta të ish-futbollistit të njohur portugez, Zhorge Kosta, aktualisht drejtor teknik i klubit të Portos. Ai u nda nga jeta në mënyrë të parakohshme në moshën 53-vjeçare pasi pësoi sot një atak kardiak.
Kosta, i cili ka qenë kapiteni legjendar i Portos në vitet kur fitoi gjithçka në Portugali e Europë nën drejtimin e Zhoze Murinjos, ishte kthyer kohët e fundit në klubin e zemrës për të marrë postin e drejtorit teknik. Ai po jepte një intervistë në mëngjesin e sotëm kur është ndjerë keq dhe ka rënë pa ndjenja. Kosta u asistua nga mjekët e klubit që ndërhynë edhe me defibrilator derisa mbërriti ambulanca për ta dërguar në spital.
Por më pas u dha lajmi se pavarësisht përpjekjeve për ta mbajtur në jetë, ai nuk ia kishte dalë dhe u dha lajmi tragjik i lamtumirës së tij të parakohshme. Zhorge Kosta kishte pësuar një kolaps edhe në vitin 2022, por asokohe ia kishte dalë t’i mbijetonte atakut kardiak.
