Pavarësisht debutimit të mirë nga Vlahoviç, duke shënuar kundër Parmës vetëm pak minuta pasi hyri në fushë si zëvendësues dhe “paqes” së ripërtërirë midis tifozëve të Juventusit dhe serbit, ‘Zonja e Vjetër’ vazhdon të qëndrojë pas Randal Kolo Muanit. Për më shumë se dy muaj, drejtori Comolli ka folur me PSG-në rreth rikthimit të sulmuesit francez në Torino, i cili ishte një lojtar kyç në huazim sezonin e kaluar dhe shumë i vlerësuar nga Tudor, i cili ka kërkuar ta ketë sërish në grup.
Negociatat midis palëve nga Torino dhe Parisi po hyjnë në një kapitull tjetër. Juventusi besonte se kishte arritur një marrëveshje në javët e fundit, por PSG e rriti çmimin për Kolo Muani në 70 milionë euro. Kjo është një shifër shumë e lartë, krahasuar me 50 milionë eurot e ofruara nga italianët në mesin e gushtit. Por qëllimet e lojtarit dhe të Juventusit janë të qarta, aq sa ‘SportMediaset’ thotë se drejtuesit e Juventusit kanë vendosur ta rrisin përsëri standardin, duke arritur në 60 milionë euro.
Drejtori i Përgjithshëm Comolli synon një huazim prej 10 milionë eurosh me një detyrim blerjeje prej 50 milionë eurosh. Kjo marrëveshje do të minimizonte ndikimin në buxhetin e Juventusit këtë vit. Topi tani është në fushën e PSG-së, me Kolo Muanin dhe Juventusin që kërkojnë një përpjekje të madhe dhe një hap përpara për të mbyllur këtë marrëveshje maratonë. Ndërkohë, e ardhmja e Vlahovic do duhet të vendoset, në një lojë opsionesh të ndërthurura që do të ndezin ditët e fundit të merkatos së transferimeve.
Fakt është se Juventusi dhe Kolo Muani e kërkojnë njëri-tjetrin dhe tani PSG do duhet të bindet për të lënë të lirë 26-vjeçarin e sulmit, me vetëm pak ditë nga fundi i merkatos së verës.
