Ka nisur në mënyrë të shkëlqyer debutimi për Azdren Llullakun, me skuadrën e Astras në ligën e parë të futbollit në Rumani. Sulmuesi i kombëtares kuq e zi, i transferuar këtë verë në kampionatin rumun, ka luajtur në ndeshjen e parë të kampionatit me Astran duke debutuar me një gol, pikërisht përballë skuadrës së Steauas së Bukureshtit, ku aktivizohet futbollisti tjetër i kombëtares Kamer Qaka. Goli i sulmuesit të kombëtares erdhi në minutën e 43 të takimit.Pas një goditje këndi, Llullaku futet brenda zonës duke shmangur mbrojtësit kundërshtarë dhe devijon topin me kokë, duke e dërguar në rrjetë dhe më pas niset për të festuar te tifozët e skuadrës së tij duke bërë dhe Shqiponjën.
Mjaftoi ky gol për skuadrën e Astras që të marrë tre pikë në nisjen e kampionatit dhe të shpresojë për një sezon më të mirë. Ndërkohë ndryshe ka qenë situata për mesfushorin e kombëtares Kamer Qaka i cili e nisi ndeshjen nga stoli duke u hedhur në fushën e lojës në minutën e 61-të por do të zëvendësohej shumë shpejt pasi mbeti i dëmtuar.
