Në vendimet e marra së fundi nga Komisioni i Disiplinës, binte në sy dënimi me një ndeshje i mesfushorit të Flamurtarit, Idriz Bathës, për shkak të lojës së rëndë të tij ndaj kundërshtarit. Një vendim i marrë nga Disiplina, pasi janë analizuar pamjet filmike të ndeshjes Flamurtari-Teuta. Diçka e rrallë në futbollin tonë, për të mos thënë se ndodh për herë të parë.
Një vendim që njëkohësisht vërteton edhe gafën e ndërkombëtarit Eldorjan Hamiti, që e gjykoi atë ndeshje. Për episodin në fjalë, ku lojtari i Flamurtarit ndërhyn shumë ashpër ndaj kundërshtarit të shtrirë në tokë, Hamiti nuk ka dhënë as karton të verdhë, ndërkohë që duhej të jepte karton të kuq.
Një gabim i pafalshëm për një arbitër me stemën e FIFA-s dhe që tani i bie që të marrë edhe ai dënimin përkatës nga sektori i gjykimit në FSHF. Pamjet nuk kanë nevojë për koment dhe është absurd qëndrimi i arbitrit. Askush nuk e kuptoi se çfarë e pengoi atë të vepronte sipas rregullores në atë moment.
