Ndodhi të tilla i dëgjon vetëm në Shqipëri, siç jemi mësuar me shprehjen: “Policia nuk merr përsipër ruajtjen e qetësisë në ndeshje”, apo së fundmi në Pogradec u bë e famshme shprehja: “Spitali nuk sjell autoambulancë në ndeshjet e ekipit të parë dhe të moshave”.
Absurde! Kjo nuk i ka hije, sepse është një institucion shtetëror mbi të gjitha që duhet të përgjigjet për jetën e atij qyteti apo dhe aktivitetet që zhvillohen, aq më tepër që klubi i futbollit i është drejtuar me shkresë zyrtare 48 orëë para çdo ndeshje që zhvillohet sipas kalendarit zyrtar të Kategorisë së Parë, por edhe të moshave.
Por, duket se spitali rajonal nuk e ka vënë “ujin në zjarr” për asnjë moment, e madje duke mos lejuar as një mjek që të jetë present në stadium! Në Pogradec e kanë zgjidhur me autoambulancëë private në disa sfida që kanë luajtur në “Gjorgji Kyçyku”, ndërsa së fundmi janë detyruar që me ndihmën e bashkisë, e cila mbulon e vetme edhe shpenzimet për skuadrën e futbollit të blejnë një autoambulancë, në mënyrë që të mos rrezikohet jeta e askujt duke luajtur futboll! Madje, duke paguar me honorare edhe një mjek!
