Sulmuesi portugez i Juventusit, Cristiano Ronaldo, i ka ofenduar futbollistët e Romës para ndeshjes të së shtunës mes këtyre dy klubeve italiane, duke thënë se me asnjë lojtar në atë skuadër nuk do ta shkëmbente fanellën.
Ronaldo ishte përsëri në qendër të vëmendjes këtë fundjavë pas transferimit të tij nga Real Madridi këtë verë, pasi që arriti t’ia sigurojë skuadrës së tij fitoren me rezultat 1-0 përmes golit të shënuar nga pika e penalltisë.
Kjo fitore bëri që Juventusi ta mbajë distancën prej tetë pikësh me klubin në pozitën e dytë në tabelën e Serisë A, Napolin. Tani, skuadra e Massimiliano Allegrit do të tentojë ta vazhdojë ecurinë e ndeshje të mposhtur në Serie A edhe kundër Romës këtë të shtunë.
Para kësaj ndeshjeje, golashënuesi i dytë më i miri për këtë sezon të Serisë A, Ronaldo, sugjeroi se lojtarët e Romës nuk janë mjaftueshëm të mirë për ta shkëmbyer fanellën e tij me njërin prej tyre.
“Roma? Nuk ka asnjë lojtar me të cilin do ta shkëmbeja fanellën”, ka thënë Ronaldo, i cili për herë të fundit ishte ndeshur në Ligën e Kampionëve me verdhekuqtë në mars të vitit 2016, në të cilën e kishte shënuar një gol.