Kurrsesi nuk ka fshehur vlerësimin, madje me superlativa për yllin e skuadrës së tij, duke e krahasuar me rëndësinë e Messi te Barça, apo të CR7 te Juventus, por nën presionin dhe kërcënimin e largimit të tij drejt Real Madrid, me kontratën që shkon drejt skadimit, trajneri i Chelseas, Maurizio Sarri ka dhënë ultimatumin adresuar belgun Eden Hazard dhe presidentit të klubit londinez.
“Unë nuk jam president, nuk jam unë ai që merret me merkaton. Detyra ime është ajo e trajnerit dhe duhet të flas vetëm për atë që futbollisti bën në fushë, por në rastin konkret, problemin e të ardhmes së Hazard duhet ta zgjidhim menjëherë”, citohet të ketë deklaruar trajneri i Chelseas, Maurizio Sarri. Ishte pikërisht ish-trajneri i Napolit, që insistoi fuqishëm të ndalte largimin e belgut drejt Real Madrid që në merkaton e verës, kur ai mori drejtimin e “Bluve të Londrës”.
