Neymar mund të ishte lojtar i Real Madrid dhe s’do e kishte veshur kurrë fanellën e Barcelonës, po gjithçka u prish për 60 mijë euro.
Ka qenë zbuluesi i talenteve Paco de Grazia, i cili punoi për 30 vite te “Los Blancos” dhe mban firmën për zbulimin e të madhit Raul Gonzales.
“Ai erdhi në Madrid kur ishte 13-14 vjeç. Nga aeroporti arriti në qendrën sportive për stërvitje me lojtarë një vit më të mëdhenj dhe ai e kaloi provën, më pas luajti me ata që ishin dy vite më të mëdhenj. Gjithçka ishte e kryer, licenca u dorëzua në Federatë, por familja Neymar kërkoi 60.000 euro për të blerë një shtëpi për gjyshërit që nuk donin të transferoheshin në Madrid. Reali e refuzoi këtë kërkesë dhe marrëveshja u hodh në ajër“, tha Paco de Grazia.
Tashmë historia e Neymar njihet dhe nuk ka nevojë për fjalë, mjafton të kujtojmë që ai është lojtari i shitur më shtrenjtë në historinë e futbollit dhe Florentino Perez ka bërë shumë tentativë për ta marrë në “Bernabeu” atë.
