Sikur të mos i mjaftonin pesë humbjet e fundit në kampionat, Besa është katandisur si mos më keq, pikërisht në prag të sfidës me Besëlidhjen. Në seancën e djeshme stërvitore, nën urdhrat e trajnerit Bledar Sinella, ishin vetëm 12 futbollistë, thënë ndryshe formacioni dhe portieri rezervë.
Të pyetur rreth këtij fakti, ndihmësi i Sinellës, Edmond Kodra, në një prononcim për “Panorama Sport” është shprehur: “Siç e dini prej ditësh kemi lojtarë të dëmtuar, si Mirel Duka, Edmond Hoxha, Tedi Cara dhe së fundi ndaj Dinamos u dëmtua rëndë dhe Emrush Kaloshi. Në këto kushte me Dinamon afruam lojtarë të U- 19, ashtu siç edhe e keni parë”, tha Kodra. Listës së mungesave i shtohet edhe Isufi, tashmë i larguar nga Besa dy javë më parë.
