Një nga më të mirët në fushë për Kosovën, si dhe autor i golit të parë, ishte Milot Rashica, dhe duke folur për “Supersport” pas fitores me Bullgarinë, lojtari i Verderit në Gjermani tregoi se çelësi i përmbysjes ishte goli i dytë, që i dha akoma më shumë energji në minutat e fundit ekipit.
Si çdo ndeshje, edhe këtu i patëm rastet. Nuk shënuam më herët, e kthyem nga 2-1, dhe jemi shumë të kënaqur. Goli në minutat e fundit, e bën më të shijshëm këtë fitore. Dhamë gjithçka nga vetja, deri në fund. Kemi kohë që i kemi ndërprerë stërvitjet me klubet, kemi pasur shumë udhëtime. Por, me këtë fitore tani gjithçka ja vlen.
Çfarë ju bën të besoni në përmbysje të rezultatit?
Të gjithë e kemi ditur që nuk kemi ardhur këtu për 1 pikë. Kemi ardhur për fitore, por do e pranonim edhe një barazim. Momenti kyç ishte goli i dytë, aty e morëm energjinë, dhe sulmuam deri në momentin e fundit. Tifozët, lojtarët nga stoli, të gjithë kemi besuar se mund të kthejmë dhe në fund ia dolëm të marrim një fitore.
